【全季最緊湊】計到百分一秒都一樣 三駒同步觸線!



90年香港金盃,衝線時五匹馬一齊影相決勝負,結果前香港冠軍騎師、騎到搖吓搖吓嘅魯賓遜,搖住岳敦匹「星之皇」馬林中穿上來險勝,呢場經典賽事講到宜家!


卅十年後的今日,賽事緊湊度有增無減,群駒密攏壓線鏡頭頻頻出現,好話唔好聽,真係未到最後一刻,都唔知自己中唔中!


數上季群駒並排鬥衝賽事,有三場真係唔講唔得,先講「大震撼」子嗣「興惑」谷草206場開齋一役,呢場大家若果有買嘅話,真係睇到個心都跳出嚟,事關「扎西德勒」本來先出頭,但終點前郭能內閃逼住抽慢隻馬,咁大鑊喇...幾匹對手同時撲上,加速力最慢、中段以為冇咗嘅「興惑」,竟然靠堯仔努力打番上來,呢場一至六名係半馬位內分勝負,大家睇吓張鬥馬相,就知咩係一線之差!

賽事:https://bit.ly/317P0q3



另外,今季第442場二班二千米,拉士亦係風起雲湧,呢場「超級綠洲」在中檔率先透出,勢頭似係佢贏喇...點知呢隻澳洲打吡季軍鱷魚頭老襯底,最後幾步慢車,而莫雅「龍鼓飛揚」跑線不佳亦抽來抽去,潘頓「時時有餘」諗住可趁機開齋喇,但內欄突然攝多隻馬,原來係田泰安21倍冷門「必妙星」,呢場一至四名相距只係0.03秒之內,接近到爆呀,買邊隻輸咗都冇得講!

賽事:https://bit.ly/2DnFIhi



不過上季有場三頭馬車賽事,三隻馬計到小數點後兩個位,時間依然一樣!講嘅係426場二班千四,直路中段2倍半大熱「開心好玩」走甩似帶到,但拉士五十石哥30倍灰馬「皇龍大將」同埋威哥嘅「輝煌星」拍住追到,一放兩追合共三隻馬,經電眼判決先分到名次,最終「皇龍大將」在彭國年力騎下,以一條毛之先衝贏,「開心好玩」畀佢頂到第二噃,最慘係「輝煌星」時間上完全冇輸,但賽績輸鼻位跑第三,連Q都撻埋呀~

賽事https://bit.ly/2XksSYa

0 views0 comments