【分秒在握】愈贏愈勁真係妙

苗禮德對於來投馬，向來採取用盡一時態度，而事實上，只要馬匹能抵受到高壓操練，效果往往相當好，「真妙星」愈贏愈勁，升班仍難看低。

上季來港的「真妙星」，在高伯新馬房跑了一季半，期間試過入Q，但表現絕不能算好。不過轉投苗廐之後，馬匹完完全全大幅提升，先在四班1400米大炒「自然君子」四個多身位，繼而在三班以五位多狂勝「快馬飛馳」，兩次大炒對手合共加了24分，以為要抖抖消化加分壓力？但上仗依然無畏無懼，以個多身位輕取「嘉應精彩」及「鑽飛龍」。

好了，來到今次升上二班，「真妙星」比上仗少負9磅外，更值得留意的，其實是馬匹上仗的取勝姿態。

上仗贏來有餘未盡

以往「真妙星」兩次取勝，均是守好位下衝贏對手，但上仗卻是留到幾近包尾，結果跑法不同之下，直路依然能夠交出凌厲後勁，而且當一衝過對手，田泰安已左顧右盼，根本仍有分在手兼耗力不多，季尾當銳之輩，當然值得再追。

■長風

第九場　10真妙星　　11競駿天驕

　　　　 6美麗掌聲　 2蒙古王