【和你揀】潘頓香港經典一哩坐騎3揀1

今季四歲系列賽快將開打，首關香港經典一哩將於下月27日舉行，各路四歲精兵正積極備戰，另一邊廂，騎師們亦正落力爭取優質坐騎，當然潘頓同雷神就另作別論，可以睇定慢慢揀。

潘頓在剛過去的國際賽四大皆空，獎金落後雷神一大截，當然希望在下半季的一系列大賽補數，其中四歲系列賽三關總獎金合共四千萬港元，若然能包攬晒三關頭馬，勁過中六合彩。下月首關香港經典一哩，潘頓目前有三匹心儀坐騎，分別是羅富全旗下「超級綠洲」及「駿龍駒」，以及告東尼旗下「將耀」。

潘頓將會策騎「超級綠洲」角逐下周四跑馬地二班1650米，另外下個月5號沙田賽事，就會策騎「駿龍駒」及「將耀」分途角逐1400米及1800米，之後將會從中決定真命天子。如果各位馬迷係潘頓，又會點揀呢?