【唔好唔出】超級丁落足心機炮製新星

丁冠豪旗下嘅「君達星」剛響完成四捷，能夠將呢匹傷病馬養番好，都可以講係省靚招牌，嚟緊日賽，雖然出馬唔算多，但就有另一粒星，列陣頭場嘅「青心星」，絕對係佢呢次嘅重心出擊。

「青心星」響上年暑假八月到港，無病無痛操足七個月至開上前線，練者以至幕後都夠晒耐性，其實睇番呢系馬，向來都係唔好唔出，同主已退役「天心星」固然係一出即勝，而同家族養響柏廐嘅同期新馬「達心星」初出跑第二，跟住再跑成功補中，更值得留意兩匹新馬都係來自新西蘭同一貨源，當地擺埋響同一個練馬師度訓練，嚟到香港先至分別擺響兩個馬房而已。

既然貨源有保證，加埋馬主家族作風一致，丁冠豪亦都畀足耐性撚好呢匹馬，而且呢匹從化兵北上訓練有一段長時間，都可以講係馬房嘅秘密武器，連潘頓之前從未摸過，今次初出都肯應承出戰，加埋呢個強勁配搭，機會係點，大家都應該心裏有數。