【愛妻一號】黃婉曼老公名下兩駒贏試閘

前天氣小姐黃婉曼自從嫁咗畀馮柏基做咗馮太之後，過著幸福少奶奶生活，真係羨煞旁人，而馮柏基又一直喜歡賽馬運動，亦同時係馬主，以前養過一匹馬叫「薑餅人」，在2016年4月份跑完後退役，相隔三年多，佢終於再以個人名義抽到簽，購入一匹英國三歲自購馬命名為「天氣先生」，評78分起步，並交由韋達馬房訓練，睇馬名已知馮先生係愛妻一號。

「天氣先生」在八月中已在港投入操練，適應水土甚快，狀態正逐漸攀升，今晨更安排出試第12組泥地試閘，交由沈拿策騎，馬兒出閘反應敏銳，前速飛快且一放到底掄元，表現甚為矚目，大家記得吼實此駒日後進度。

另外，馮柏基為馬主團體成員的另一匹戰馬，方嘉柏馬房訓練的「跳出香港」，亦安排同日在第8組1600米草地閘出試，由何澤堯策騎，更大炒對手四個半馬位勝出，勇達巔峰。