Boom！希威森同甲烷再爆一次可以嗎？

年紀輕輕嘅南非騎師希威森今季來到香港發展，但佢今年四月嘅時候因為喺南非犯規被罰停賽，上訴過後維持原判，9月中要被罰停賽4日，對於一位啱啱喺香港發展嘅騎師，無疑構成一定打擊。而開季已經兩個月希威森仲未喺香港有頭馬進帳，未交出表現，實力坐騎欠奉都係人之常情，不過同鄉霍利時一直都畀支持呢位後生仔，莫欺少年窮呀嘛。

今期谷草賽事將「甲烷」同「勝感」嘅帥權交畀希威森，列陣第一場四班1200米嘅「甲烷」，呢匹PPG季內第一次響谷草上陣就喺希威森胯下爆大冷披，真係同佢個名一樣爆呀，霍老爺今次繼續將帥權交畀騎者，睇嚟仲想爆多鑊。今朝希威森為「甲烷」快操，準備咁充足，加上今仗實力對手唔多，「甲烷」真係有機會幫埋希威森開齋呀。