如果做騎師，22歲都可以算係年青好手，咁如果話你知依家有位練馬師，都係得22歲，仲要贏埋一級賽，大家係咪覺得好神奇呢？講緊嘅就係愛爾蘭名牌練馬師岳伯仁嘅公子岳品賢喇。呢匹只得22歲嘅後生仔，舊年仲係做緊騎師兼幫老竇岳伯仁贏一級賽，但今年因為體重問題，同佢哥哥岳本賢一樣，棄騎從練。
不過，咪以為岳品賢得22歲，就睇小佢嘅練馬功力，尋晚光榮古活賽期第三日賽事，由佢訓練嘅3歲馬女「珍稀藍鑽」(Fancy Blue)角逐2000米一級賽蘭秀錦標，結果以頸位之微擊敗馬昆坐騎One Voice，繼上仗贏出法國橡樹後再贏G1，亦係岳品賢從練後第二場一級賽勝利。
值得一提，尋日係日本種王「大震撼」離世一周年紀念，咁啱「珍稀藍鑽」亦係「大震撼」嘅子嗣，結果順利贏G1，可算非常巧合，而岳品賢賽後不諱言有可能安排「珍稀藍鑽」年底遠征角逐日本盃。