大衛希斯今季再度來港從練，自然令人充滿期待，其實喺佢對上一次有港從練時，曾經收過鄭雨滇做徒弟，呢位本地薑當年都算火速竄紅，即使希斯其後離港，阿滇仍能扳上華將一哥之位，可惜其後卻因墮馬，與及四度觸犯天條，最終未能馬會發牌，並於2017年離開香港。
鄭雨滇近年曾於英國擔任騎馬人，去年終於獲英國賽馬會發出騎師牌照，但支持度不算多，早前亦曾南下新西蘭探望退休練馬師告達理。最近阿滇又返回英國，亦漸漸獲得出賽機會，尋晚佢喺溫伐咸頓馬場尾場1700米膠沙地賽事策騎New Look上陣，結果憑呢匹51倍冷門剷入一席季軍，落後女將杜苑欣嘅大熱門Recuerdame兩馬位，今年於英國四度出賽首度入圍，總算有個好開始。
為咗紀念呢個季軍，鄭雨滇亦係自己社交平台上載咗張自己跑第三嘅相，立即吸引唔少圈中人畀like，當中包括練馬師呂健威。睇嚟只要畀啲心機，呢位啱啱39歲嘅前華將一哥，絕對有機會再次贏馬啦。