首先各位唔好畀呢個標題嚇親，關於呢個問題，筆者唔會話有咩100%啱或錯嘅答案，絕對有討論空間，唔會一言堂。毫無疑問，近五年潘頓、莫雷拉喺香港馬圈嘅影響力，真係無出其右，事關佢兩個一季加埋起碼贏二百幾W，但嚴格嚟講，佢兩個又唔係成日鬥得咁燦爛，除咗前季要鬥到煞科日同埋今季應該會鬥到尾，好多時都係一個拋離另一個。不過，潘雷之爭的確係近年馬圈最佳話題，馬會都鍾意搵呢樣嘢嚟宣傳，咁究竟佢兩個鬥得咁犀利，對馬圈係好事定係壞事？筆者就咁睇：
1. 體育運動需要宿敵對決：體育運動如果有一對宿敵對決，的確可以帶嚟更多話題，吸引更多人注意。足球近年就有C朗鬥美斯、羽毛球就係林丹Vs李宗偉、網球則有費達拿鬥拿度，正正因為有呢啲咁有代表性嘅人物，令更多人關注呢幾項運動。賽馬，作為其中一項體育運動，同樣需要呢啲元素，可惜係馬匹對決呢方面，近年好少出現有兩匹實力接近嘅佳駟互相比拚，「美麗傳承」對上兩季獨大，「步步友」亦試過毫無敵手，所以潘頓與莫雷拉兩大高手之爭，顯得更得珍貴，對馬圈嚟講，肯定係好事。
2. 賽事可觀性增加：剛周日「明欣賞」鬥「美麗多多」夠精彩啩，再唔係「與龍共舞」兩鬥「傑彩繽紛」，同埋「夏威夷」鬥「美麗傳承」、上季香港瓶「時時精綵」鬥「雍容白荷」，場場賽事都夠晒精彩。另外，正正因為呢兩大高手嘅高水平對抗，目前於香港發展嘅騎師亦要提升自己水平，當中最成功例子應該係華將一哥何澤堯，近幾年騎功大躍進，今年贏埋一級賽同埋香港打吡，筆者亦覺得可能係潘雷之爭帶嚟嘅正面影響。
3. 弱肉強食 富者愈富：講完兩個好處，潘雷之爭又點會冇弊處。馬圈向來弱肉強食，強者愈者，但自從有咗潘頓、莫雷拉之爭後，情況更加嚴重，近年佢兩個佔咗三成頭馬，全季獎金肯定超過一億，有時仲可能會超過兩億，其他騎師自然難搵食，吳嘉晉已經轉往幕後發展，依家輪到蘇狄雄跑完今季掛靴，同時正正因為佢兩個獨大，亦少咗名牌騎師肯嚟香港客串。
對筆者嚟講，潘頓鬥莫雷拉究竟為香港馬圈利多於弊，抑或弊多於利，真係無絕對答案，但每次見到好多位騎師話難搵食唔撈，筆者始終有啲唔開心感覺。