法國騎師彭國年，今季嚟到香港展開兩個月客串期，喺元旦賽馬日當日，彭國年首次喺香港上陣，喺尾場就以「快益善」嚟證明自己實力，重磅騎師向來喺香港都唔易搵食，但彭國年鬥後勁一流，所以有唔少練馬師吼實，紛紛提供坐騎畀佢，就好似徐雨石馬房嘅「皇龍大將」咁，都係靠彭國年鬥後勁鬥贏咋！ 話咁快今期谷草夜賽係彭國年在港最後一戰，佢將會有六匹坐騎列陣，當中有啲鬥後勁嘅馬都交咗畀佢執韁，再爆冷都唔好太意外，就好似第七場一班1200米嘅「鑽得勁」，呢匹姚廐賽駒季初曾經喺沈拿胯下爆51倍冷門而贏，練者都講過隻馬好忠心，雖然今仗要面對強手「君達星」，但都唔能夠忽視呢匹馬居中跑，然後直路爆一段。 另外第八場三班1650米嘅「勤德兼備」向來都喺直路有強勢衝刺，喺負重磅之下近兩仗都跑入一亞一季，演出夠晒準繩，喺今期補中嘅話，仲有機會捧走埋跑馬地百萬挑戰盃。