蘇偉賢：雄龍升班靠輕磅開齋

蘇偉賢馬房成績近期回升，近四個賽日裏面，三期都有頭馬進帳。其實賢廐有唔少戰兵都跑到入局，值得跟進。 今期沙田全泥夜宴，賢廐有四駒列正選。當中列陣第五場四班1650米嘅「雄龍」，今季喺泥地賽事跑咗四場，都有獎金袋走，表現穩定。而蘇偉賢今朝受訪時，表示「雄龍」今季演出準繩，但仍未出頭，希望今次重返四班作戰，憑輕磅之利會有突破。「雄龍」今仗抽得2檔，由田泰安執韁。蘇偉賢同田泰安今季攜手贏咗6場賽事，可謂相當合拍。今次係田泰安首次策騎「雄龍」，睇吓安仔可唔可以幫佢出頭啦！