鄧迪47歲做榮陞外公，近年與囝囝鄧狄倫頻頻同場競技。
曾經做過苗廐主帥嘅澳洲名將鄧迪，雖然已經年屆47，不過一樣響澳洲穩佔維省騎師榜前列位置，近日家庭傳來喜訊，佢嘅愛女Jessica已經佗住B仔，預產期係明年初，換言之鄧迪未到50就榮陞做外公。
近年騎師策騎年齡普遍都有明顯增長，澳洲方面一班頂級高手如薄奇能、岳禮華、鄧迪、韋紀力都係年過40之輩，但講到榮陞阿公、阿爺級數騎師，圈中就唔算多，當中就只得年近60嘅杜達爾(David Tootell)，而另一位就係以44歲成為最後生外公嘅白布朗，如今就輪到鄧迪加入佢哋行列。
目前鄧迪就已經有囝囝鄧狄倫(Dylan Dunn)繼承主砵，係維省騎師年表一輩嘅表表者，兩仔爺亦不時有同場競技場面，不過鄧迪就講笑，唔想響綠茵場上三代同場角逐，即使外孫日後投身騎師行業，屆時自己年過60已經退休，亦無謂向大家面前獻醜咁話。