剛戰姚本輝馬房大舉出擊，賽前計落以為得幾匹邊線機會馬，點知「超霸無敵」同「新界之星」爆冷贏馬，熱門W就有「同盟力量」，仲有「又夠醒」入Q，升上練馬師榜第一位，只能話自己眼拙，不過我最欣賞輝哥肯畀機會唔同騎師，其中合作最成功一定係利敬國，14次合作有4冠1亞3季4殿，得兩次唔入前四，今戰國仔夫卜上陣，其中有兩匹嚟自姚廐，要高度留神呀！
第三場四班1000米都幾多質新馬，就算出過賽都未有睇頭，「鼓浪威風」睇紙上賽績上次跑第七唔特別，但上仗黎海榮早段用力騎幾經辛苦先攝到二疊，轉彎都未回氣又開始發力，最後負3個幾馬位都算係咁，今仗賽前換上利敬國考閘加交叉鼻箍輕鬆跟前，最後頭二馬都拋甩其他對手勝出，睇嚟呢個配備有啲幫助，有賠率博一注先！
好友利試閘有睇頭 頭場四班有一半初出馬，始終未落過場難言信心，徐廐嘅「好友利」上季曾經喺同程上過名，上仗排9檔全程三疊蝕到入肉，末段冇乜落鞭都持續有走勢，而「好友利」賽前同高分馬試閘都不落下風，今次對手唔強，如果呢隻國仔坐騎跑出都幾好分！