今季開倉嘅韋達，旗下唔少質新馬可以一鳴驚人，但亦有失敗之作，禮拜日第三場嘅「威風凜凜」絕對係其中之一。呢匹4歲澳洲PPG，1月中初出跑田草1200米被捧成1.8倍大熱門，點知放到埋門力弱只得殿軍，翌仗再用田泰安跑同程，獨贏繼續只得1.9倍，今次就出閘慢咗，全程無遮擋走三疊，轉彎又外閃，更加慘敗而回。
連續兩仗唔夠兩倍慘輸，韋達已經立即諗計，2月中搵莫雷拉幫手騎「威風凜凜」，可惜沿途走勢一般，直路開鞭都無反應，事後發現原來心律不正，搞到要抖一段時間，等咗近四個月先復出。如果單計今個月初試800米田草閘嘅走勢，「威風凜凜」的確唔算吸引，究竟係咪隻馬收歛咗？唯一肯定今次縮程跑1000米，應該唔係大熱門，睇吓又跑成點？