熱門，只要有少少不利因素，就要有戒心。冷門，卻只要有啲啲利好條件，就不妨買返啲。好似聽晚拆禮物日嘅頭場五班谷草1200米，葉楚航馬房嘅「蜜運」，本身跑10場未入過三甲，又抽12檔，肯定係冷門，但如果細心啲，就會發覺呢匹冷門未必冇得博。
葉楚航近期成績顯著反彈，廐內嘅五班馬居功至偉，事關葉廐近4W有3場嚟自五班，而呢匹「蜜運」季初評37分喺泥地1200米後上跑第五名，但依家已經跌到得返29分，況且今次重咗23磅，亦係佢在港咁耐體重最高嘅一次，話唔定係好現象。
另外，「蜜運」雖則初跑谷草，表面睇就無場地經驗，但佢啲在港同父馬好似「星際武士」、「錢照收」、「幸運大兄」同埋「萬眾之力」都擅跑谷草1200米，話唔定轉場有突破都唔奇。